የኢትዮጵያ ህዝብ የጋራ ትግል ሸንጎ [ሸንጎ] ኦፊሴላዊ ድረ ገፅ

Switch to desktop Register Login

የሕዝባዊ ውይይት ጥሪ

 

Hits: 982

ታላቅ ሕዝባዊ ስብሰባ በፍራንክፈርት ተካሄደ

 

በጀርመን የኢ/ዊያን የትብብርና የውይይት መድረክ በሀገራችን ውቅታዊና አንገብጋቢ  ችግሮች ዙርያ ከኢ/ዊያን ወገኖች ጋር ቅዳሜ ሐምሌ 09.07.2016 በፍራንክፈርት ከተማ የተሳካ  ሕዝባዊ ስብሰባ አካሂደዋል።
ስብሰባው የተጀመረው የውይይትና የትብብር መድረኩ ባለፈው ዓመት ስላከናወናቸው አበይት ተግባራትን አስመልክቶ በውይይትና የትብብር መድረኩ ሰብሳቢ አማካይነት የቀረበውን አጭር የስራ ሪፖርት በማዳመጥ ነበር።
ተሰብሳብዎችን ያወያዩት በአሜርካን ሀገር በሰሜን ካሮላይና ሴንትራል ዩኒቨርስቲ የስነጥበብ ማእከል ፕሮፌሰርና የሸንጎው ከፍተኛ አመራር ኮሚቴ አባል የሆኑት ታዋቂው ኢትዮጵያዊ ፕሮፌሰር አቻሜየለህ ደበላ ናቸው።
ፕሮፌሰር አቻሜየለህ ደበላ የሸንጎውን መሰረታዊ ዓላማና ደንብ አባላትን ሸንጎው እስከዛሬ ያከናወናቸውን ተግባራት ለወደፊቱ ሊተገብራቸው ያሰባቸውን ዝርዝር  እቅዶችን በአጠቃላይ በሀገራችን ፖለቲካ  የሸንጎውን ድርሻና ሚና በስፋትና በጥልቀት በመዘርዘር ዛሬ በሀገራችን ተክስተው ለሚገኙት ዘርፌ ብዙ ችግሮች ዋናው ተጠያቂና የችግሩ መንስዔ የሆነው በኢትዮጵያ በስልጣን ላይ ያለው ገዥ የወያኔ ኢሕአዲግ መንግስት ከሚያራምደው ዘረኛ ፖሊሲና በጎሳ ከፋፍሎ መግዛት ስርዓት የተነሳ መሆኑን ከተለያዩ አቅጣጫዎች በመነሳት በዝርዝር በመተንተን በማስረጃ በተደገፉ ተግባራት የሚታዩትን ችግሮች በሰፊው በማብራራት ኣአስረድተዋል።

ከወያኔው መንግስት ካስከተለው ችግሮችም ጎን እኛም በተቃዋሚ ጎራ የቆምነው ክፍሎች በአንድነት በመተባበር ለመታገል አለመቻላችን ደግሞ ችግራችንን የበለጠ ለማባባስና ውስብስብ በማድረጉ ረገድ የራሳችንን አፍራሻ አስተዋጽኦ ማበርከታችንን ፕሮፌሰር አቻሜየለህ ደበላ እንዲዚሁ ለተሰብሳቢዎቹ አስረድተዋል፡፡
ፕሮፌሰር አቻሜየለህ፣ ሰለ ህውሃት/ኢሕአዲግ ከፋፋይና አግላይ ስርዓት ሲገልጹም የሚከተሉትን ነጥቦች ዘርዝረዋል፣
የስርዓቱ እንዳለ መቀጠል ለሀገር አንድነትም ሆነ ለህዝባችን ሰላም እጅግ ሰፊ አደጋን ይጋብዛል በመሆኑም የስርዓቱ መቀየር ለነገ የማይባል አሁን የግድ መለወጥ ያለበት ስርዓት ነው ይላሉ፡፡
በሀገራችን ውስጥ የተለያዩ ወገኖቻችን የተለያዩ ብሶት እንዳለባቸው ግልጽ ነው፣ለወደፊት ለሚመሰረተው አዲሱ ስርዓት ኢትዮጵያዊያን የሀገራችንን ችግሮች በሀገራችን አንድነት ጥላ ስር በሰላማዊ መንገድ እንዲፈቱ መነጋገር መወያየት መደራደር መስማማትና ለዚህም መስራት ይኖርብናል፡፡

አያይዘውም ሲያብራሩ በየምክናያቱ ሀገራችንን ለመበታተን የሚደረገውን እንቅስቃሴ ሁሉ ያለምንም ማወላወል ልንቃወመው ይገባናል አሁን በህዝባችን ላይ የተጫነው ስርዓት ተወግዶ የሁሉም ኢትዮጵያዊ ቋንቋው የተከበረበት ማንነቱ የተከበረበት የህግ የበላይ የሰፈነበት ህገ መንግስታዊ ዲሞክራሲያዊ ስርዓት መመስረት አጣዳፊ ተግባራችንም እንደሆነ አሳስበዋል።
በክብር እንግድነት ተጋብዘው የሰብሰባውን ታዳሚዎች ያወያዩት ፕሮፌሰር አቻሜየለህ ከሸንጎው እይታ አኳያም ሲገልጹ አግላይ ያልሆነ የተቃዋሚ ሰፊ ግንባር/ትብብር መመስረት አስፈላጊነቱን፣ በተበታተነ መልክ የሚካሄደው ትግል ለየብቻ በሚደረግበት ጥቃት ሰላባ ከመሆም አልፎ የኢትዮጵያ ሕዝብ የሚፈልገውን ለውጥ ሊያመጣ ይችላል ብሎ መገመት
ያዳግታል፡፡በእርግጥም ለሀገራችን ብሩህ ተስፋ ሰንቀው የሚንቀሳቀሱ ድርጅቶች ይህንን ተገንዝበው መላን የተላበሰ የተባበረ
ትግል ማድረግ እጅግ አስላጊ ስለመሆኑና ለዚህም ተግባራዊነት ደግሞ ሸንጎው ዝግጁ መሆኑን ገልጸዋል። የታቃዋሚው ክፍል መተባበር ቢያንስ ሕውሀት/ኢሕአዲግን ለማስገደድ አስፈላጊ ስለመሆኑ ሸንጎው ያሳስባል፡፡

ተቃዋሚ ከአግላይ ፖለቲካና ከየአውራ ፓርቲ አባዜ ራሱን ማላቀቅ እጅግ አስፈላጊ መሆኑንና በሀገራችን ውስጥ በስፋት የቀጠለውን የነጻነት ትግል የወገኖቻችንን በተለይም ወጣቶች ለሰበአዊና ዲሞክራሲያዊ መብታቸው መከበር እንደ ሁለተኛ ዜጋ እየተቆጠሩ መኖር እንዲያበቃ ለማድረግ ቆርጠው እየታገሉ መሆናቸውና ውድ ህይወታቸውንም ጭምር እየገበሩ እንደሆነ ግልጽ ነው፣ ይህንን መስዋእትነት ለውጤት ለማብቃት በጋራ እንነሳ፣ የኢትዮጵያና የኢትዮጵያዊያን ታላቅነት የዚህች ታሪካዊ ሀገርና ሕዝቧ ታላቅነት እንዲሁም ብሩህ ቀን ከፊት ለፊታችን መሆኑን አበክረው ገልጸዋል።

ፕሮፌሰር አቻሜየለህ ከሀገራችን የፖለቲካ ትግል ጎንም በሙያቸው ደግሞ ሰለሀገራችን ባህል ወግና ልምድ ታሪካዊ እሰቶችን
 
ለማስተዋወቅና ለታሪክ መዝግቦ ለማቆየት ያደረጉትን ዛሬም በማድረግ ላይ የሚገኙትን እንደዚሁ በመረጃ በተደገፈ መልክ አቀናባብረው ለጠቅላላው ሕዝባዊ ሰብሰባ ተካፋዮች በሚገባ አስረድተውል።

በዚህ ሕዝባዊ ስብሰባ ላይም በእንግድነት ተጋብዘው ከነበሩት መሀከል እንደዚሁ ከወልቃይት ጠገዴ የአማራ ክልል አከባቢ የልሳነ ጉፉአን ድርጅትን በመወከል አቶ ገብሩ ማማዬ በሰብሰባው ላይ በመሳተፍ የወያኔን መንግስት  በወልቃይት ጠገዴ የአማራ ሕዝብ ላይ እያደረሰ ያለውን የጅምላ ጭፍጨፋን የዘር ማጥፋት ወንጀልንና ከዚሁም ጋር የወልቃይት ጠገዴን እውነተኛ ማንነትን በተመለከተ ያለውን በተጨባጭ ከታሪካዊ ማስረጃ ጋር በማነጻጸር ለተሰብሳቢዎቹ ሰፊ ገለጻ አድርገዋል።

ከዚህም በተጨማሪ ከስብሰባው ታዳሚዎች መሀከልም ብዙዎቹ ሰለ ሀገራችን  የፖለቲካ ትግልና በተለይም ዛሬ በየቅጣጫው ተቀጣጥሎ ያለውን ሕዝባዊ ዓመጽን አስመልከቶ የሸንጎውን ሚናና እይታ በምን መልክና ደረጃስ ላይ እንዳለ ለማወቅ ለተጠየቁት ብዙ ጥያቄዎች ፕሮፌሰር አቻሜየለህ ደበላ የሸንጎውን ሚናና እይታ በተለያየ መልኩ በመዘርዘር በተለይም ለሀገራችን ዘላቂ ሰላምና መረጋጋትን ለማምጣት የሁላችንም የኢትዮጵያዊያንን መኖርያና መከበርያችን የሆነችውን ኢትዮጵያን በመገንባቱ ረገድ ከእያንዳዳችን የሚጠበቅብንን ዜግነታዊ ድርሻና ሸንጎም እንድ አንድ የጋራ ሕዝባዊ ደርጅት በሀገራችን በፖለቲካው ሕይወት ውስጥ ሊኖረው የሚገባውን ቦታና ሊጫወት የሚችለውንም ሚና በመተንተን ከቤቱ ለተጠየቁት ጥይቄዎች አጥጋቢ መልስ ስጥተዋል።

በመጨረሻም ፕሮፌሰር ኣአቻሜየለህ ደበላ በሀገራችን በየዘርፉ የተከሰተውን ሕዝባዊ ዓመጽና እንቢተኝነት ወደ ተግባር በማድረስ ተደራጅተው በሚገኙትና ሕዝባዊ ድርጅቶችም ሆነ ፖለቲካ ድርጅቶች ሁላችንም እንደዜጋ የበኩላችንን ዜግነታዊ ድርሻ እንድንወጣ በማሳሰብና ከራሳቸውም ልምድና ተመክሮ በመነሳት ለመላው ስብሳባ ተካፋዮች ምክራቸውን በመለገስ ስብሰባው በታቀደው መሰረት በሰላማዊ መንገድ ተጠናቆአል።


ድል ለኢትዮጵያ ሕዝብ ኢትዮጵያ ለዘለዓለም ትኑር

ሐምሌ 09.07.2016
ፍራንክፈርት/ ጀርመን

 

Hits: 797

ኢትዮጵያ - ከአምባገነን ወደ ዴሞክራሲያዊ ስርአት እንዴት? በዲሲ የነገይቱ ኢትዮጵያ ኮንፈረንስ የቀረበ

የሽንጎው እይታና ራ

የኢትዮጵያ እውነታዎች

አሁን በስልጣን ላይ ያለው በህወሓት የበላይነት የሚመራው ቡድን በተለያዩ የውጭ ሃይሎች ድጋፍና በመሳርያ ሃይል ሀገሪቱን ከመቆጣጠሩ በፊት፣ ለሀገሪቱ ሁለንትናዊ ችግር ምንጭ የብሄር ጭቆና መሆኑንና ብቸኛውና ዋናው መፍትሄ ደግሞ በዋናነት በዚህ ችግር ላይያተኮረ መሆን እንዳለበት ሲያቀነቅን፣ በርዕዮተ-ዓለም ደረጃም የአልባንያን ሶሽያሊዝም  እንደመርህ ይዞ  ሁለገብ ዴሞራሲያዊ መፍትሄዎችን እንደማይቀበል ሲገልጥ እንደነበር ይታወቃል።

ይህን አስተሳሰቡን ይዞ ሀገሪቱን የተቆጣጠረው ኃይል፣ የመጀመሪያው እርምጃው የነበረው ይህን አስተሳሰቡን የማይቀበሉትን የፖለቲካ ኃይሎች (በተለይም ሀገር አቀፍ ድርጅቶች)ማጥቃትና ከፖለቲካው ሂደት እንዲገለሉ ማድረግ ነበር። የማግለል ፖለቲካውን በነዚህ ሀገራዊ የፖለቲካ ኃይሎች ላይ የጀመረው ህወሀት/ኢህአዴግ የሽግግሩ መንግስት ሊፈጠር አጥቢያ ተቋቁመውም  ይሁን ቀደም ብለው ተደራጅተው ሲንቀሳቀሱ የነበሩ ብሄር ተኮር ድርጅቶች በሽግግር ሂደቱ እንዲሳተፉ ቢፈቅድም፣  (የነዚህን ድርጅቶች ማሳተፍ መቀበሉ ለጊዜአዊ ጠቀሜታ የተቀየሰ እንጂ ነጻ ሆኑ ድርጅቶችን ለማሳተፍ ከመነጨ እምነት አልነበረምና) ብዙም ሳይቆዩ ከሂደቱ እንዲገለሉና የተወሰኑትም በህገወጥነትና በጠላትነት ተፈርጀው ”ሰላማዊ“ ከሚባለው ፖለቲካዊ ሂደት በፍጹም እንዲወጡ አድርጓል።

የስርዓቱንአራማጆች ይህንኑ አመላካከት በመቀጠል እስካሁን ድረስ የተለያዩ አስተሳሰብና ራዕይ ያላቸውን ዜጎች በሰላምና ህግንበተከተለ መልክ በፖለቲካው ምህዳሩ እንዳይሳተፉ  የሚከለክልፖለቲካዊ አካሄድ እንዲከተሉ  ያደረጋቸውም ይኽው በአግላይነት ላይ የተመሰረተ ፍራቻን፣ጥላቻንና ለራሳቸው የሚሰጡት የተጋነነ አመለካከትን አካቶ የሚገለጸው ቅኝታቸው ነው።

በመሆኑም፣ ሐገራችን ኢትዮጵያና ህዝቧ ላለፉት 25አመታት እጅግ ፈታኝ በሆነ ሁኔታ ውስጥ  ወድቀዋል።ስርአቱ ምንም እንኳን ዴሞክራሲያዊና ባለ ብዙ ፓርቲ ስርአትን ያመላከቱ በመሠረታዊ የሕግ ሠነዶች (“ሕገመንግሥት፣ ሕጎችና ደንቦች”) ያሠፈረ ቢሆንም፣በተግባር የሚታየው ግን   የህወሀት/ኢህአዴግን በተለይም ደግሞ  የህወሀትን የበላይነት በሚያረጋገጥ መልኩ ተቀይሶና ተዋቅሮ የሚንቀሳቀስ ብሄርን/ዘውግን መሰረት ያደረገ የአንድ ድርጅት ፣ ከዚያም አልፎ የጥቂት ግለሰቦች አምባገነንንት የሰፈነበት መሆኑን ነው። ይህ ስርአት በፖለቲካውም ሆነ በኢኮኖሚውበኩል የሚያሳየው አግላይነት፣ የመብት መጣስ፤ ጭካኔና መጠነ ሰፊ ግፍ ህዝቡን ወደ ታላቅ ቁጣና ህዝባዊ እምቢተኛነትእየገፋው ነው።

ይህ የህዝብ ቁጣ  በተለያየ መልክ፣በተለያየ ጊዜ፣የተገለጠ ቢሆንም፣ በአንድ በኩል በስርአቱ ዘግናኝ አፈናበሌላ በኩል ደግሞ በተቃዋሚ ድርጅቶች መከፋፈል፤ ብቃት ማነስና ተባብረው መቆም አለመቻል፣ተፈላጊውን ግብ ሳይመታ ቆይቷል።

አሁን ደግሞ ይኸው የህዝብ የለውጥ ፍላጎትና አልገዛም ባይነት በተለያዩ ሀገሪቱ ክፍሎች ተቀጣጥሎ ቀጥሏል። በሽንጎው እይታ ይህ የህዝብ በቃኝ ባይነት፣የሀገርን አንድነትና የህዝብን መልካም ትስስር ሳያበላሽ የስርአት ለውጥን እውን እንዲያደርግ፣ ከዚያም አልፎ የግጭቶች  እና መጠፋፋት አዙሪትን ለመስበር በተቃዋሚዎች በኩል ምን መደረግ አለበት ብሎ መቀራረብ፤ መመካከር፣ እና ከቃላት በላይ ተግባራዊ እርምጃዎችን መውሰድ የወቅቱ ዋነኛ ጥያቄ ነው።

ሕወሀት ኢህአዴግ ለ25 አመታት ተግባራዊ ያደረገው ስርአት በራእዩም በተግባሩም በቅራኔና በግጭት የተወጠረ እንዲሁም የህዝብን መሰረታዊ ፍላጎት ሊያረካ የማይችል በመሆኑ ነው ከሁሉም የህብረተሰብ ክፍል ጋር እየተጋጨ የራሱን መጨረሻ በፍጥነት እያቃረበ የሚገኘው። ስርአቱ የሚያራምደው በብሄር ማንነት ላይ የተመሰረተ ፖለቲካና ተግባረዊ ያደረገው ያስተዳደር ክልል በበቂ ጥናትና ህዝብን ባሳተፈ መልክ የታለመና የተተገበረ ስላልሆነ እነሆ ራሱ ህወሀት/ኢህአዴግን ሳይቀር ራሱ ባጠመደው ወጥመድ እርስበርስ ወደመባላት ያደረሰው ሲሆን  ሀገሪቱንም ወደ መፈራረስና ህዝቡንም ወደ እርስ በርስ ግጭት አደጋ ጠርዝ አድርሷታል። 

በህዝብ እና በስርአቱ መካከል ያለው ቅራኔ የስርአቱ ባለስልጣናት እንደሚሉት በጥቂት “ኪራይ ሰብሳቢዎች” ምክንያት ወይም በየተዋረዱ የሚገኙ ባለስልጣናት ስራቸውን በደንብ ስላልሰሩ ወይም “ካፈጻጸም” ጋር በተያያዘ ምክንያት ብቻ የተከሰተ ሳይሆን ስርአቱ የህዝብን መሰረታዊ መብት ሊያከብር ባለመቻሉ፣ የህግ የበላይነትን ሊያከብር ባለመቻሉ የመንግስት ስልጣን ከህዝብ አመኔታ ብቻ መምጣት እንዳለበት ሊቀበል ባለመቻሉ፣ የሀገሪቱን ዳር ድንበርና ብሄራዊ ጥቅም ሊያሰጠበቅ ባለመቻሉ ህገመንግስት ተብሎ የቀረበው የፖለቲካ ፕሮግራምም የህዝብን አመኔታም ከበሬታም ያገኝ ባለመሆኑ፣ ህዝብ መንግስቱንም፤ ስርአቱንም የኔ ብሎ ስላልተቀበለው ነው። ቅራኔው በህዝብ የነጻነት ፍላጎትና በስርአቱ በአምባገነንነት እድሜልክ ለመግዛት ባለው ቅዥት መካከል ነው። ስርአቱ ኢትዮጵያውያንን ለመከፋፈል፣ እርስ በርስ ለማጋጨትና ተደላድሎ ለመግዛት ያጠመደው ፈንጂ ባሁኑ ሰአት በእጁ ላይ ፈንድቶ የሚያደርገውን አሳጥቶታል።

የስርአቱንና የህዝቡን ቅራኔ ባጭሩ እንደሚከተለው እናቀርባለን፡

በፖለቲካና ሰብአዊ መብት ገጽታው፤

ያለፉትን 25 አመታት የሀገራችንን ሁኔታ ስንመረምር መረዳት እንደሚቻለው፤ የፖለቲካ ድርጅቶች በነጻ የሚንቀሳቀሱበት ምህዳር ጭራሽ ጠቧል፣ የብዙሀን መገናኛወች ፣ ከተራ ወከባ እስከ ግድያ በደረሰ መንግስታዊ ተጽእኖ ድምጥማጣቸውን ለማጥፋት ጥረቱ ቀጥሏል። የብዙሀን ድርጅቶች እንዳይመሰረቱ ከማገድ አልፎ ከተመሰረቱም አቅም የሌላቸው ሆነው እንዲቀሩ እየተደረገ ነው። ስርአቱ የዕምነት ነፃነትን በተደጋጋሚ ገፏል። የዕምነት ተቋማትንም አፍርሷል፣ በጣልቃገብነት አተራምሷል። የዜጎችን የመጻፍ የመናገር፣ በነጻ የመደራጀት፣ ሰላማዊ ሰልፍ የማካሄድ ተቃውሞን የመግለጥ መብት ወዘተ አፍኗል። ህዝብ የሚያስተዳድሩትን መሪዎቹን በራሱ ድምጽ የመሾምም የመሻርም መብቱ ተገፎ፣ እነሆ ህወሀት ኢህአዴግ በ2005 አይን ያወጣ ያደባባይ የድምጽ ዝርፊያ አካሂዶ አሽንፌአለሁ አለ  በመቀጠልም በ 2010 በተካሄደውን ምርጫ በ99.6 % በ2015 ቱ ደግሞ በ100% አሽንፌአለሁ የሚል አስገራሚም አሳዛኝም ፖለቲካዊ ፊዝ ተከስቷል። ይኼ ተደጋጋሚ የምርጫ ማጭበርበር ኢትዮጵያዊያን በምርጫ ተስፋ እንዳይኖራቸው አድርጓል።

የኢኮኖሚያዊሁኔታዎችን ስንመለከት

 

ገዥው ህወሀት/ኢህአዴግ የሀገሪቱ ኢኮኖሚ ከአመት አመት ከ 10% እና 12% እድገት አሳይቷል ሲል ቆይቷል። ሆኖም፤ የድሀው ፣ የበረንዳ አዳሪው፣ በቀን አንድ ጊዜ መብላት የማይችለው ህዝብ ቁጥር፣ የስራ አጡ ቁጥር ወዘተ እጅግ ከፍተኛ ነው።  የኑሮ ውድነት ህዝብ ሊቋቋመው ከማይችለው ደረጃ ላይ ደርሷል። ባለፉት 25 አመታት እጅግ ሰፊ ቁጥር ያለው ህዝብ በረሀብ አለንጋ ተገርፏል። ብዙወችም በየቦታው ሞተዋል። ኢትዮጵያ በታሪኳ አይታው ከምታውቀው ሁሉ የበለጠ ቁጥር ያለው ህዝብ ( በፊበርዋሩ 2016 የዩኤስ አይ ዲ ዘገባ መሰረት ከ10-15 ሚሊዮን ያክል ህዝብ) ዛሬ ተርቦ ይገኛል። የሚወራው የሁለት አሰርት አመታት የኢኮኖሚ እድገት ውጤት ለብዙሀኑ በተጨባጭ በህዝብ ህይወት መሻሻል ላይ አይታይም። በተጻራሪው የፓርቲና የመንግሥት ባለሥልጣናት ቤተሰቦችና ተቋማት በኢትዮጵያ ታሪክ ታይቶ የማይታወቅ ገቢና ኃብት ሰብስበዋል። የድሎትና የቅንጦት ኑሮ ይኖራሉ።

በሀገሪቱ የተለያየ ክፍሎች በከተማ መስፋፋትና በልማት፣ ባለሀብቶችን በማግባባትና በመሳብ ስም ኢትዮጵያውያን ለዘመናት ከኖሩበት መሬት ያለፍላጎታቸው በጉልበት እንዲፈናቀሉ እየተደረገ ነው። የመሬት ነጠቃ በጋምቤላ፤ በቤነሻንጉል፤ በደቡብ፤ በኦሮሚያ፤ በአማራና በአፋር ወዘተ ክልሎች በሰፊው ተካሂዷል፤ እየተካሄደም ነው።  ሁኔታው በገጠሪቱ ኢትዮጵያ ብቻ የተወሰነ ሳይሆን በከተሞችም በሚያሳዝን ሁኔታ ህዝብን ማፈናቀሉ በሰፊው መካሄድ ከጀመረ አመታት አስቆጥሯል።  ለምሳሌ በአዲስ አበባ ነዋሪ ግለሰቦች ሶስት እና አራት ትውልድ ከኖሩበት ቤታቸው በልማት ስም፣ መኖሪያ ቤታችሁ ለሰፋፊ ህንጻ ስራ ይፈለጋል ተብለው  ያለፍላጎታቸው እና ያለበቂ ካሳ እያለቀሱ እንዲፋናቀሉ እየተደረገ ነው።

በአዲስ አበባ በፍልውሀ አካባቢ፣ በዶሮ መነቂያ አካባቢ በአራት ኪሎ፣ በሜክሲኮ አደባባይ ወዘተ ብዚ ሽህ ኢትዮጵያውያን የተፈናቀሉት በዚህ መልክ ነው። ተመሳሳይ ማፈናቀል እና የመሬት ነጠቃ  በባህርዳርና በመቀሌ ወዘተ ተካሂዷል።

በቅርቡ በኦሮምያም  የተቀሰቀሰው የህዝብ መነሳሳት አንዱ ምክንያት ይኸው ቅጥ ያጣ፣ የመሬት ነጠቃና የህዝብን መሰረታዊ መብት እና የመኖር መብት ቅንጣት ያክል የማያገናዝበው የስርአቱ ስግብግብ ፖሊሲና የባለስልጣናቱም አልጠግብ ባይነት ነው።

የማህበራዊ ሁኔታ

በማህበራዊ ጉዳዮች  እንጻርም የኢትዮጵያ ህዝብ እጅግ አሰቃቂ ሁኔታ ላይ ይገኛል። ወጣቱ ተስፋ አጥቷል። ኑሮን ለማሽነፍ ሲባል ሴተኛ አዳሪነት እጅግ በርክቷል። አሁን ደግሞ ወጣት ወንዶችም በዚሁ ተግባር ተሰማርተዋል። ኢትዮጵያ ወጣቶች በገፍ ከሚሰደዱባቸው አገሮች መካክል አንዷ ናት። ወላጆች እጅግ ተስፋ ከማጣታቸው የተነሳ የወለዷቸውን ልጆቻቸውን፣ አባት እናት የሌላቸው በማስመሰል ለማደጎ መስጠት የተለመደ ሆኗል። ህጸናትን በማደጎ ለባእዳን እንደሽቀጥ በመላክ ኢትዮጳያ ካፍሪካ ግንባር ቀደም ሆናለች።

የጋራ በሆነው የሀገርና የታሪክ እሴት መኩራት እየተቡረቦረ ነው።  የህዝባችን አንድነት ተናግቷል፣ በመርዘኛ ከፋፋይ የሆነ ፖለቲካ የተነሳ በህብረተሰቡ ውስጥ መፈራራት፣ በጥርጣሬ መተያየት እጅግ አስፈሪ በሆነ ፍጥነት ተስፋፍቷል። ኢትዮጵያውያንን ካንዱ ክልል የዚህ ቋንቋ ተናጋሪ ስለሆንክ ልቀቅ ብሎ ማባረር የዚህ ቋንቋ ተናጋሪወች እንዳይመጡብን ማለት ዛሬ የተለመደ ሆኗል።

የዚህ ሁሉ መሰረት ከሆኑት ጉዳዮች ውስጥ አንዱ ህወሀት ኢህአዴግ ያለህዝብ ተሳትፎ፣ ያለበቂ ምክክርና ጥናት “ህገመንግስት“ ብሎ ተግባራዊ ያደረገው የፓርቲው ፕሮግራም እንዲሁም በቀጣይነት እየተተገበረ ያለው በጥላቻ ላይ የተማከለ የመንግስት ፖሊሲ ነው። ኢትዮጵያ ከዓለም አገሮች በተለየ ሁኔታ በብሄር/በዘውግ እንድትለያይ ተደርጓል። አንቀጽ 39 የመገንጠል መብትን ህጋዊ አድርጓል።  ይህን የብዙ ችግሮቻችን መሰረት የሆነውን ህገመንግስት አንቀበልም የሚሉትን አንዳንዶች ጸረ ፊደራሊዝም፤ የብሄርን የብሄረሰብን መብት ለመንጠቅ የተዘጋጁ ወዘተ አድርጎ ለማቅረብ ይጥራል። ይህ ሁኔታውን አለመረዳት ወይም ተራ ፕሮፓጋንዳ ነው። ፊደራሊዝምን የማይቀበሉ ተቃዋሚ የፖለቲካ ድርጅቶች ቢኖሩም እጅግ ጥቂት ናቸው፡ ፡ እኛም ሆን ብዙ ኢትዮ/ጵያውያን  የማንቀበለው በፊደራሊዝም ስም ተግባረዊ እየተደረገ ያለውን፣ አድልኦ የተሞላበት፣ ተገንጣይነትን የሚቀበል፤ ግጭቶችንና ቅራኔዎችን ቀፍቃፊ የሆነ ከፋፋይ ሥርኣትና አሰራርን ነው። የጋራ ማንነት የጋራ እሴት ከማዳበር ይልቅ ማዳከምን የሚያበረታታውን “እኛና እነሱ” የሚለውን አጥር የሚያጠናክረውን ህግ ነው። በተፈጥሮ ኃብት ላይ፤ በተለይ በመሬት ላይ የሚካሄደው ግጭት የህገመንግሥቱ ውጤት ነው። የኛ ራእይ ሁሉም ኢትዮጵያዊ ቋንቋው ባህሉ፤ ማንነቱ የሚከበርነት አንድነታችንን የሚያጠናክር የሁሉም ዜጎች መብት ሙሉ በሙሉ የሚከበርበት፣ ኢትዮጵያውያን ሁሉ በማንነታቸው ኮርተው ንብረታቸውን ሳይነጠቁ፣ ከቀያቸው ሰይፈናቀሉ፣ በማንኛውም የሀገሪቱ ክፍል ያለፍራቻ የሚኖሩበትን ህገመንግስታዊ  ዴሞክራሲአዊ ስርአትን እውን ማድረግ ነው።

በሀራዊ ሉአላዊነት ሰላምና መረጋጋት

ኢህአዴግ የመጀመሪያ አመታት መረጋጋት የነበረ ቢመስልም ይህ ግን ብዙም አልቀጠለም። በ2010 የክራይስስ ግሩፕ ዘገባ እንደተረጋገጠውም ከዘጠኙ ክልሎች ውስጥበኦሮሚያ፣ በአማራ፣ በአፋር፣ በሶማሊያ፣ በጋምቤላ፣ በቤኔሻንጉል፣ በትግራይ ይነስም ይብዛም እስከ መሣሪያ መጠቀም የደረሱ ግጭቶች ይታያሉ። ኢትዮጵያ ከጊዜ ወደ ጊዜ መረጋጋት እየጠፋባት፣ የውጭ ጠላት አገሮች ጣልቃ እየገቡባትና እየከበቧት፤ በፍጥነት ከባድ ወደሆነ ቀውስና ውድቀት እየገባች ነው። ለዚህ አመቻች የሆነው ሁኔታ የአገር ውስጥ መከፋፈል መሆኑ የሚያከራክር አይመስለንም።

ስርአቱ ለኢትዮጵያ ሀገራዊ አንድነት እና ሉአላዊነት ግድ የሌለው መሆኑን በተደጋጋሚ አሳይቷል። የኢትዮጵያን ህጋዊም ታሪካዊ ሁኔታን እንዲሆም ጥቅም ችላ ባለና ሀላፊነት በጎደለው አካሄድ ህወሀት ኢህእዴግ የኤርትራን መገንጠል አመቻችቶ ሀገራችንን የባህር በርም አሳጥቷታል፡፡ ይህ ሀላፊነት ጎደለው ውሳኔ አሳፋሪ ብቻ ሳይሆን ሀገሪቱ ለታላቅ አደጋ እንድትጋለጥ አድርጓል።

አሁን በቅርቡ ደግሞ በምእራቡ የሀገራችን ክፍል በኩል ለም ወሀ-ገብና ደን-ለበስ ሠፊ መሬት ለሱዳን እያስረከበ ነው ። ይህ አርቆ አሳቢነት የጎደለው ተግባር ዛሬ በራሱ በህወሀት ኢህአዴግ አባላት ሳይቀር ግንዛቤን እያገኝ ነው።

የግፍ ሞልቶ መፍሰስ እና የህዝብ በቃኝ ማለት

የስርአቱ የግፍ በትርና ያላቋረጠ አፈና የህዝብን የነጻነት ፍላጎትና ትግል ሊያከስመው ከቶውንም አልቻለም። በአሁኑ ሳአት ወገኖቻችን በኦሮሚያ በአማራ፣ በደቡብ ኢትዮጵያ ፣ በአዲስ አበባ ታክሲ ሾፌሮች ወዘተ እነሆ በታላቅ ቁጣ በቃኝ ብለው ተነስቷል።

አሁን የሚታየው ትግል አበረታች ገጽታወቹ ውስጥ የሚከተሉትን ጉልህ ሁኔታወች ማንሳት እንችላለን፡

የሰላማዊ ትግሉ ተስፋ ሰጭነት መታደስ

የህወሀት/ኢሕአዴግ አገዛዝ የህዝብን ሰላማዊ እንቅስቃሴ ደረጃ በደረጃ ሊያልፈሰፍሰው እና ደብዛውን ሊያጠፋ ሲጥር እነሆ አመታት ተቆጥረዋል። ይህ በህዝብ ሰላማዊ ትግል እና በገዝው ቡድን ረገጣ መካከል የሚካሄደው ትግል አንድ ጊዜ ሲጎለብት ሌላጊዜ ደግሞ ሲዳከም ቆይቶ  ባለፈው አመት (2007) ምርጫ ዋዜማ እጅግ የተቀነባበረ የጥቃት እርምጃ በመንግስት ደርሶበታል። ከዚህም የተነሳ ብዙወችሰላማዊ ታጋዮች ተገድለዋል ታሰረዋል፣ ሌሎች ለስደት ተዳርገዋል፣ ድረጅቶችምበጉልበት ህጋዊነታቸውን ተነጥቀው ተበትነዋል::  አንዳንዶች ደግሞ የሰላማዊ ትግሉ ተስፋ የለውም በኢትዮጵያ ውስጥ አይሰራም፤ በፍጹም ሊያንሰራራ ወደማይችልበት ደረጃ ደርሷል ብለው ተስፋ እሰከመቁረጥ እንዲደርሱ አድርጓል።

ይህ አይነቱ ተስፋ መቁረጥ በተለይም በሊህቃኑ በኩል አየተከሰተ ባለበት ሁኔታ ነው ሰላማዊ ትግሉ እጅግ ባልታሰበ ሁኔታ ፈንድቶ በሰፊ የሀገሪቱ ክፍል እየተቀጣጠለ የሚገኘው። ይህ ሰላማዊ የህዝብ ትግል ህዝባዊ እምቢተኛነት በኦሮሚያ ክልል በአማራ ክልል በተለይም በጎንደር የተለያዩ አካባቢወችና በወልቃይት በጠገዴ፣ በደቡብ ኢትዮጵያ ወዘተ በሰፊው እየተቀጣጠለ ይገኛል።

ህዝባችን የጭቆናውን ስርአት ለማስወገድ በህይወቱ ሳይቀር ዋጋ እየከፈለ ቆርጦ መነሳቱን እያሰመሰከረ ነው። ይህ እውነታ ባኦሮሚያ፣ በጎንደር በደቡብ ኢትዮጵጵያ፣ ባዲስ አባባ፣ በባህርዳር ወዘተ ተመስክሯል

የስርአቱ ድጋፍ እየተሟጠጠ መምጣት

በአሁኑ ሳአት በየቦታው በመቀጣጠል ላይ የሚገኘው የህዝብ መነሳሳት ገዥው ቡድን የድጋፍ መሰረቱ እጅግ እየጠበበ እንደሆነ ይደግፈኛል በሚለው በከተማው ብቻ ሳይሆን በገጠርም በሞስሊሙም በክርስትና ሀይማኖት ተከታዮችም፣ በኦሮሞ፣ በአማራ፣ በቤነሻንጉልም በአፋር፣ በኦጋዴን፣ በትግራይም በደቡብም ክልል የሚኖረው ህብረተሰብ ውስጥ  ቦታ ማጣቱን ያሳያል። ስርአቱን ያዋቀሩት ህወሀትና ሶስቱ ድርጅቶች እርስበርስ መተማመን፣ እየመነመነ ነው፣ አንዱ ሌላውን ይከሳል፤ እርስበርስ ባይነ ቁራኛ ነው የሚተያዩት። ይህ ሁሉየስርአቱ እድሜ ወደመጨረሻው እየደረሰ እንደሆነ አመላካች ነው።

በተጨማሪም በህዝብ ትግል ግፊት የአዲስ አበባና የአጎራባች ከተሞች የተቀናጀ የልማት ዕቅድ የተባለውን ኦህዴድና ህወሓት በዘገምታም ቢሆን መሠረዛቸውአንዳንድ ችግሮቹን አባብሰዋል፣ መልካም አስተዳደር የሚባለውንም በጎላ መልኩ አበላሽቷል፣ በሙስናም ተጋልጠዋል  የሚላቸውን ዝቅተኛና መለስተኛ ሹማምንት ገዥው ቡድን ከስልጣናቸው ማንሳት መጀመሩ የህዝብ ትግል እያስገኘ ያለውን ድል አመላካች ነው። ይህ ድል ዘላቂነት እንዲኖረው እንመኛለን፤ እንፈልጋለን።

ከድርጅቶች ባሻገር ህዝብን መሰረት ያደረገ ትግል መጠናከር

ሌላው በኦሮሚያም፣ ይሁን በአማራው ክልሎች አሁን የተነሳውን የህዝብ እንቅስቃሴ ካለፉት ሁሉ ለየት የሚያደርገው በቀጥታ ከላይ ወደታች  የሚመራ ሳይሆን በህብረተሰቡ መሀል በተፈጠረ አመራር ከህዝቡ መሰረታዊ ኑሮ ጋር በተዛመደ አጀንዳ በህብረተሰቡ ታቅፎ የሚንቀሳቀስ ዳይንሚክ ሀይል መሆኑ ነው።የዚህ አይነቱ መሰረት ያለው የህዝብ እንቅስቃሴ ሰፋ ያለ ውጤትን ለማስመዝገብ ያለው ችሎታ ከፍተኛና አበረታች ነው

ተጓዳኝ አደጋወች

ተስፋ ሰጭ ሁኔታወች እንደሚታዩት ሁሉ አሳሳቢ የሆኑና የሁሉንም ኢትዮጵየዊ ልዩ ትኩረት የሚሹ ዋና ዋና ጉዳዩች ውስጥ  የሚከተለውን እንመለከታለን።

የሀገር አንድነት መናጋት አደጋ

የሀዝቡ ትግል እየተጠናከረ ሲመጣ “የትግሉ ባለቤት እኔ ነኝ አመራር ሰጭውም እኔ ነኝ “ የሚሉ የተለያዩ ክፍሎች ብቅ ብቅ እያሉ ይገኛል። ይህ አካሄድ አልፎ አልፎ አግላይ የሆነ አዝማሚያን የሚከተል ሲሆን አንዳንድ ጊዜም  እኛና አነሱ የሚለውን አጥር እጅግ በማጠናከር የተወሰነውን ህዝብ ትግል  ለተወሰነ አግላይ የፖለቲካ አጀንዳ መጠቀሚያ የማድረግ አዝማሚያ ይታያል። ለምሳሌም በኦሮሞ ክልል የተከሰተውን እንቅስቃሴ ከሌላው ጋር የማይያያዝ የኦሮምኛ ቋንቋ ተናጋሪው የብቻ ወይም የተናጠል ጉዳይ እንደሆነና የሌላው ኢትዮጵያዊ ተግባር በተራ አጋርነት ደረጃ ማገዝ እንጂ ከዚያ ያለፈ፤ ሊሆን እንደማይገባው፤  በተወሰኑ ክፍሎች/ቡድኖች ተደጋጋሚ ቅስቀሳ ሲደረግ ተደምጣል። ይህ ህዝብን በጎራ ለይቶ በተለያየ ጠርዝ አስቀምጦ የሚያይ አካሄድ የሚያጠናክረው መቻቻልንና አንድነትን ሳይሆን ሩቅ ለሩቅ መተያትንና መከፋፈልን ነው

ቀረብ ብሎ ሲመረመርም ደግሞ አልፎ አልፎ ባንዳንድ ክፍሎች የሚገፋው የተቃውሞ  አካሄድ፣ “አኛና እነሱ” የሚለውን አመለካከት ጽንፍ አድርሶ ኢትዮጵያዊነትንና የሀገሪቱን የግዛት አንድነት በጥያቄ ውስጥ  የሚያሰገባ ቅኝት ይታይበታል።ለምሳሌ ባለፉት ጥቂት ወራቶች አንድን ያሀገሪቱን ክፍል ከጎረቤት ሐገር ጋር የማመሳሰል ሙከራ በተደጋጋሚ ተደምጣል።

ምንም እንኳ ከህዝብ አኳያና ከኢትዮጵያ ረዢም ታሪክ አንጻር ሲታይ፤ የኢትዮጵያዊነት መሰረት ጥልቅ ቢሆንም እንዲሁም ሀገሪቱ በታሪኳ እጅግ ብዙ ከፋፋይ አደጋወችን ያለፈች እንደሆነ ቢታወቅም በብሄር ላይ ያተኮረና ኢትዮጵያዊነትን  በጥያቄ ውስጥ ያሰገባ አካሄድ በጊዜ ካልተገታ በኤርትራ እንዳየነው ሁሉ ማእከላዊው መንግስት እየተዳከመ ሲመጣ  የሀገሪቱ ህልውናም ሆነ የህብረተሰቡ ደህንነት በአደጋ ላይ ሊወድቁ የሚችሉበት ሁኔታ ሊከሰት እንደሚችል በግንዛቤ ውስጥ ማስገባት ያስፈልጋል፡፡ በእኛ እይታ ይህን አደጋ ለመቋቋም ከፍተኛ ጥረት ያሰፈልጋል።

ኢትዮጵያዊነትን አልቀበልም ያለ የብሄረተኛ ድርጅቶች መጠናከር አደጋ

ይህን አሁን የተጀመረውን የህዝቡ እንቅስቃሴ ለማፈን ህወሀት/ኢህአዴግ የሚወስደው የግፍ እርምጃ ብዙወችን በማንነት ላይ ያተኮረ አመለካከት እንዲያጠናክሩ ያበረታታል። በአንድ በኩል መብት ረጋጩ መሪ ፓርቲ በብሄር ላይ የተመሰረተ አገዛዝ በመሆኑ በሌላ በኩልም የሀገሪቱ ስርአት ማንነት ላይ አተኩሮ የተዋቀረ በመሆኑ ሁኔታውን በቀላሉ የብሄረተኛነት ሰለባ እንዲሆን ያደርገዋል። በዚህ የፖለቲካ ሁኔታ ውስጥ የሚደረግ እያንዳንዱ የጅምላ ጥቃት ብሄረተኞችን እያጠናከረ እንደሚሄድ የሻብያእንዲሁም የህወሀትእንቅስቃሴና የእድገት ታሪክ ብዙ ያሰተምረናል።

በአንዳንዶች በኩል ዛሬ የሚታየውን የህዝብ እምቢተኛነት  የአማራ ትግል፣ የኦሮሞ ትግል፣ የጋምቤላ ትግል የእነገሌ ትግል በሚል  ጥቅል የተጠቃሹ ቋንቋ ተናጋሪ ሁሉ አንድ ወጥ አስተሳሰብና አመለካከት ያለው አስመስለው ሲያቀርቡ ይስተዋላል። የትግሉ አቅጣጫም በሰፋፊ የቋንቋ ተናጋሪወች ተመድቦ  እንዲቃኝ የማድረግ አዝማሚያ ይታያል። በኛ አመለካከት አሁን ሀገራችን ባለችበት ውስብስብና የተካረረ ሁኔታ አደጋን ለመከላከል የሚያግዘው በቋንቋ ከፋፍሎ በያለበት ጎራ እንዲጸና የሚገፋፋ አመለካከት ሳይሆን ክፍፍሉን የሚያጠብ አንድነቱን የሚያጎላ ቅኝትና አሰራር ነው።

በሁሉም የሀገራችን  ማህበረሰብ ውስጥ የተለያየ ፖለቲካ አመለካከትና የፖለቲካ አጀንዳ አለ። የትናውም ማህበረሰባ አንድ ወጥ አይደለም። የማህበራዊ ፍትህን ( ሶሻል ጀስቲስ )  መሰረት በማድረግ፣ የማንነት ጥያቄ አግባብ ያለው ምላሽ እንዲኖረው የሚታገሉ፣ኢትዮጵያዊነትን መሰረት አድርገው  ዘረፋን፣ ምዝበራን ታሪካዊም ይሁን አሁን የሚታይን አግላይነት፣ ኢፍትሀዊነትን ወዘተ የሚታገሉ አንዳሉ መደገፍም እንዳለባቸው ምንም ጥርጥሬ የለንም። በኛ በኩል ከነዚህ ክፍሎች ጋር እጅ ለጅ ተያይዘን የሁሉም ኢትዮጵያውያን ሙሉ መብት የተከበረበት ዴሞክርሲያዊ ህገመንግስታዊ ስርአት እንዲመሰረት የምናደርገው ትብብር ተጠናክሮ ይቀጥላል።

በሌላ በኩል ኢትዮጵያ የምትባል ሀገር መቀጠል የለባትም፣ እንዲያውም ኢትዮጵያ የችግራችን መሰረት ስለሆነች መፈራረስ አለባት ብለው የሚታገሉ መኖራቸውን በትክክል መገንዘብ አስፈላጊ ነው። ይህን ሁኔታ እንደሌለ ማስመሰል ፤ተዛማጅ አደጋውን ደግሞ ዝቅ አድርጎ ወይም ከሚገባው በላይ አጋኖ ለማሳየት መሞከር ተገቢ አይሆንም። ይህ ለሀገርም ለህዝብም አይጠቅምም። ይህ ሁኔታ ሁላችንም ባጽንኦት ልንመለከተው እና ለመፍትሄ ፍለጋውም በጥንቃቄ ልንመክርበት የሚገባን ጉዳይ ነው።

የእርስ በርስ ግጭት አደጋ

የህዝባችን ለዘመናት አብሮ መኖር፣መዋለድና በአያሌ ማኅበራዊ ሀይማኖታዊና ባኅላዊ ግንኙነቶች መተሳሰር፣ ወዘተእሴት እንዳለ ሆኖ፣  ከፍ ብሎ የተገለጸው ከፋፋይ ሁኔታ እየጦዘ ሊመጣ እንደሚችል በጊዜው በመገንዘብ  አደጋውን መቀነስ ካልተቻለ እጅግ አሳሳቢ የሆነ የእርስ በርስ ግጭትን ሊጋብዝ የሚችል ሁኔታ በሀገራችን ውስጥ መኖሩን እንመለከታለን።  ይህ የህዝብ እርስ በርስ ግጭት በሕወሀት/ኢህአዴግ ወይም በተቃዋሚ ውስጥ በማንነት ላይ የተመሰረተ ግጭትመካረር ይጠቅመናል ብለው በሚያሰቡ ክፍሎች ተንኳሽነት ሊቀሰቀስ ይችላል። በተጨማሪም ሀገሪቱ በማያባራ የእርስ በርስ ግጭት እንድትዘፈቅ የሚሹ የውጭ መንግስታትም (ለምሳሌ ከ2 አመት በፊት ሾልኮ የወጣው የግብጽ መንግስት ባለስልጣኖች ውይይት እንደሰማነው) የዚህ አይነቱን እኩይ ተግባር፣ በቀጥታም ሆነ በእጅ-አዙር፣  ለመጠቀም ወደ ኋላ እንደማይሉ መገንዘብ ተገቢ ነው::

የሀገር አንድነት መናጋት አደጋና የእርስበርስ የግጭት ፍራቻ አሉታዊ ተጽእኖ

እጅግ ብዙው ኢትዮጵያዊ የሕወሀት/ኢህአዴግን መወገድ እና የሰርአት ለውጥ እንዲመጣ የሚፈልግ ቢሆንም ለሀገሩ አንድነት የሚጨነቀው፤ የእርስ በርስ ግጭት የሚያሰጋውና ሌላ ያግላይ ድርጅት ስልጣን መያዝ የሚያሰሳስበው የህብረተሰብ ክፍል ስጋቱ ለህዝባዊ ትግሉ ድጋፉን እንዳይሰጥ ፣ ከዚህ የተነሳም የትግሉ አካልም ከመሆን እንዲቆጠብ ያደርገዋል። ይህ ደግሞ ትግሉንየሚያስፈልገውን በቂ ሀይልያሳጣዋል ያዳክመዋል፡፡ ተበታትኖለመጠቃት በር ይከፍታልም:: ምናልባትም ለገዥው ቡድን እንደገና መጠናከር ያልተጠበቀ ሁኔታ ሊፈጥርለት ይችላል፡፡ ይህ አደጋ የአለም አቀፍ ህብረተሰቡንም ላይ ተመሳሳይ አሉታዊ ተጽእኖ ይኖረዋል።

ስለሆነም ህዝብን ለምን አልተነሳም ብሎ ከማማረር በፊት በተቃዋሚው በኩል ህዝብን ከመነሳት ወደ ኋላ እንዲል የሚያደርገው እምነት እንዲያጣ የሚያደርግ ወይም እንቅስቃሴውን በጥርጣሬ እንዲያየው የሚያደርገው ምን ጉዳይ አለ ብሎ ወደውስጥ ተመልሶ መመልከት አስፈላጊውንም ማስተካከያ ማድረግ ተገቢ ይሆናል።

ስርአቱ እንዳለ መቀጠል በሀገር አንድነት መናጋታና እና በእርስበርስ ግጭት አኳያ ያለውን አደጋ እጅግ በማወሳሰብ ታላቁን ሚና ይጫወታል። በመሆኑም የችግሮቻችንን መፍትሄ ስናስብ የስርአት ለውጥ አስፈላጊነትን ለደቂቃም መዘንጋት የለብንም። የምሆኖ ግን በተቃዋሚው በኩል ያለውንም ሁኔታ ደግሞ በተጨባጭ መገንዘብ ተገቢ ነው።፤

ተስፋን ለማጠናከርናአደጋን ለመቀነስ  ምን ይደረግ?

በሀገራችን ውስጥ የሚታየውን የለውጥ መነሳሳት አጠናክሮ አደጋውን ቀንሶ የህዝቡን ተስፋ በማደስ ወደሚፈለገው ቦታ ለማድረስ እንዲሁም በሀገራችን ውስጥ የግጭት አዙሪትን ሰብሮ፣ ዘላቂ ሰላምን ተግባራዊ ለማድረግና ለልማት መሰረት ለማጣል የኢትዮጵያ ተቃዋሚ ሲቪክ ማህበራትና ምሁራን ታላቅ ሀላፊነት አለባቸው። ለዚህ የሚበጀው ከሁሉም በላይ ከቡድን በላይ የሃገርንና የሕዝብን ጥቅም ማስቀደም ነው።

ከላይ የተጠቀሱትን እና ሌሎችንም በግምት ውስት በማስገባት ትግሉን በተቀነባበረ መልክ የመላ ሀገሪቱን ህዝብ ያሳተፈና የአለም አቀፉንም ህብረተሰብ ድጋፍ ሊያገኝ በሚያሰችለው መልክ ወደፊት ለመግፋት የሚከተሉትን አራት ነጥቦች ላይ ያተኮረ ተግበራዊ እንቅስቃሴን ማድረግ አስፈላጊ ነው ብለን እናምናለን።

የተቃዋሚው መሰባሰብና መተባበር

ተደጋግሞ እንደተነገረው የህወሀት ኢህአዴግ መንግስትና ስርአት እድሜ የረዘመው በስርአቱ ጥናካሬ ሳይሆን በተቃዋሚው መከፋፈል፤ አለመሳባሰብ እና አለመጠናከር ነው። በሌሎች ከአምባገነን ስርአት ወደ ዴሞክራሲ የተሸጋገሩ ሀገሮች ልምድ (ለምሳሌ ፖላንድ፣ ቱኒስያ፣ ፊሊፒንስ፤ በርማ) የምንረዳው በግልጽ አላማ ዙሪያ የተሰባሰበ ተቃዋሚ ለስርአት ለውጥ ብቻ ሳይሆን ለዴሞክራሲ ስርአት ግንባታም ወሳኝ እንደሆነ ነው። በሀገራችን በኢትዮጵያ ውስጥም አሁን ያለውን የህዝብ መነሳሳት ወደሚፈለገው የስርአት ለውጥ እንዲያመራ ለማድረግ አንዱና ዋነኛው አጣዳፊ ተግባር በተወሰኑ ሀገራዊ ዓላማዎች (መርሆወች) ላይ የተሰባሰበ ሰፋ ያለ የተቃዋሚወች የጋራ ትብብር ባስቸኳይ መመስረት ነው።

ይህ ስብስብ ህብረተሰቡን በተቀናጀ መልክ እንዲታገልና፣ የእርስ በርስ ግጭትን ለማስወገድ ትልቅ መሳሪያ ነው። ከዚህም በተጨማሪ በተለያየ ቦታ የሚታየውን አለመተማመንን ለመቅረፍ በመላ ሀገሪቱም ለሚገኙ ኢትዮጵያውያንም ሆነ ለአለም አቀፉ ህብረተሰብ ገዥውን ቡድን ለመተካት የሚችል፣ የተባበረ፣ ሀገር ለመመምራት ብቃት ያለውና ሀላፊነት የሚሰማው ስብስብ (ድርጅት)፤ አመራርና ሀይል መኖሩን የሚያበስር ይሆናል።

በሽንጎው እይታ ፣ ከምስረታችን ጊዜ ጀምሮ እንደምንለው ይህ ስብስብ የሀገራችንን ግዛታዊ ሉአላዊነት እና የህዝቧንም መብትና አንድንት  ሙሉ በሙሉ ማረጋገጥ ይኖርበታል። ኢትዮጵያውያን ህወሀት /አህአዴግን ሲያሰወግዱ የሀገራቸው አንድነትና፣ የወደፊት ህልውናቸው ደግሞ ለሌላ አደጋ የማይዳረግ መሆኑን ማረጋገጥ ይፈልጋሉ። ህወሀት/ኢህአዴግን ለመተካት የሚጥረው ሌላ አግላይ ቡድን፣ ከህወሀት ኢህአዴግ ያውራ ፓርቲ ፍልስፍና ያልተላቀቀ ሀገራችን አሁን የምትገኝበት አደጋ ውስጥ የጣላትን ፖሊሲ ባዲስ መልክ ለመቀጠል የሚፈልግ ስብስብ እንዳልሆነ ማወቅ ይፈልጋሉ። ይህ ሳይሆን የህዝብን አመኔታና  ቆራጥ ተሳትፎ ማግኝት አስቸጋሪ ነው።

በሽንጎው እይታ ይህን ሰፋ ያለ የተቃዋሚወችን ስብሰብ ተግባራዊ ለማድረግ ሁሉን አቀፍ የሆነ የተቃዋሚወች ጉባኤ መጥራትና ባአሰቸኳይም እንዲካሄድ ማድረግ ቅድሚያ የሚሰጠው ተግባር ነው።

በዚህ አንጻር ሽንጎ የጉዳዩን አንገብጋቢነትና የሁኔታውን አጣዳፊነት በመረዳት ይህ የተቃዋሚወች ሰፊ ትብብር ባጭር ጊዜ ውስጥ ተግባራዊ እንዲሆን  ሁሉም ባለድርሻወች ገና ከጅምሩ  የሂደቱም የውጤቱም ባለቤት እንዲሆኑ ሰፊ ተግባራዊ እንቅስቃሴን እያካሄደ ነው። ይህ እንቅስቃሴ ባጭር ጊዜ ውስጥ ውጤታማ እንደሚሆን ታላቅ ተስፋ አለን።

የተቃዋሚውን  አቅም ግንባታ ማጠናከር

በሀገራችን የስርአት ለውጥን ለማስገኘትም ሆነ በግብታዊ እንቅስቃሴ ውስጥ ሊከሰቱ የሚችሉትን አንዳንድ አደጋወች ለመቀነስ  ተቃዋሚው አቅሙን በተለያየ መልክ  ለምሳሌም በድርጅት ጥንካሬ ፣ በተለያዩ ቦታወች መዋቅር በመዘርጋት፣ በቅራኔ አፈታት ክህሎት፤ በገንዘብ አቅም፣ በመገናኛ አቅም፣ በአመራር ብቃት በዲፕሎማኪክ ስራ ብቃት ወዘተ ሊያጠናክር  ይገባዋል። አንድ ድርጅት ብቃትና ጥንካሬ ከሌለው ከሰርአቱ ጥቃት በደረሰ ቁጥር መፍረክረክ እና ቀጣይነት ማጣት ይከተላል። ይህም ትግሉን በተደጋጋሚ በገዥዎች እንዲኮላሽ አንድ እርምጃ ወደፊት ሁለት እርምጃ ወደ ኋላ እንዲሄድ ያደርገዋል፡፡

ምንም እንኳ እያንዳንዱ የትግል እንቅስቃሴ ለቀጣዩ ትግል ትልቅ ትምህርት የሚሰጥ ቢሆነም ተደጋጋሚ ጥቃት ደግሞ ሊያሰከትል የሚችለውን ስነልቦናዊ ጉዳት በግንዛቤ ውስጥ ማስገባት ያሰፈልጋል።

ሰላማዊ ህዝባዊ ትግልን ማጠናከር

በሽንጎው እይታ ይህ አስከፊ ስርአት በህዝባዊ ሰላማዊ ትግልና የሕዝብ እምቢተኛነትዝብ አ ሊወገድ ይችላል። ይህ እንደሚቻልም በ1997 የታየው የህዝብ መነሳሳት፣ ረዘም ላለ ጊዜ በመቀጠሉ አርአያነት ያለው የሙስሊም ኢትዮጵያውያን ሠላማዊ ትግል፣ በተለያየ ወቅት ህዝቡ በተለያዩ ከተሞች በሽወች በመውጣት ለተቃዋሚ ድርጅቶች ያሳየው ድጋፍ አሁን ደግሞ በኦሮሚያ እንዲሁም በአማራ ክልል የሚታየው የህዝብ አመጽ ያዲስ አባባ ታክሲ ሾፌሮች የስራ ማቆም አድማ አመላካች ናቸው። የተለያዩ አለም አቀፍ ጥናቶች እንደምንገነዘበው ሰላማዊ ትግልና ሕዝባዊ ዐመጽ ዴሚክራሲያዊ ስርአትን ለማዋለድ፣ ጦርነት የሚያሰከትለውን ጥፋት ለመቀነስና  ያልተጠበቀ ምስቅልቅልን ለማስወገድ ታላቅ አማራጭ ነው። ሀገራችን ውስጥ የሚታየው በተወሰኑ ሃይሎች የሚቀነቀነው እጅግ ግልጥ የሆነ ኢትዮጵያን የመገነጣጠል አደጋ ደግሞ ሰላማዊ ትግልና የተሳሰረ ሕዝባዊ ዐመጽን ይበልጥ ተመራጭ ያደግረዋል። ሌላው የሰላማዊ ትግልና ሕዝባዊ ዐመጽ ጠቀሜታ ደግሞ ትግላችን ከውጭ ጥገኝነት እንዲላቀቅ የሚያግዝ መሆኑ ነው። ሰላማዊ ትግልና ሕዝባዊ ዐመጽዝብአሕሕ የሚመካው በራሱ በተጨቋኙ ህዝቡ ላይ ነው።

ሁሉም እንደሚገነዘበው፤ ዛሬ የህዝባችን ትግል ከስር ፈንቅሎ በመነሳት ከፍተኛ አልበገሬነትን እያሳየ በመጓዝ ላይ ነው። የህዝብ ትግል ከአምባገነን  ስርአትም መወገድም በኋላ ወደ ተደላደለ ዴሞክራሲ ለማምራት የተሻለ እድል የሚኖረው  በሰላማዊና በሕዝባዊ ዐመጽ መንገድ የተካሄደ ለውጥ ሲሆን እንደሆነ ብዙ ጥናቶች አሳይተዋል። ከነዚህ ጥናቶችም  ወስጥ ከ1990 እስከ 2006 የተካሄዱ 320 ያክል ሳላማዊና የሕዝብ ዐመጽን ያካተቱ  ትግሎችን የገመገመ (Why Civil Resistance Works ) በሚል ርእስ በማርያ ስቲፋን እና ኤሪክ ቸንወርዝ (Maria J. Stephan and Erica Chenoweth፤ The Strategic Logic of Nonviolence) የቀረበው  ጥናት እንዲሁም በ2005 ለንባብ የበቃው  የ35 አመታት የስልጣን ሽግግር ታሪካን የፈተሽው “ነጳነትን እንዴት መጎናጸፍ ተቻለ”፤ ከህዝባዊ እምቢተኛነት ወደ ተረጋጋ ዴሞክራሲ” (How freedom is won ; from civic  resistance to Durable Democracy ) የሚለው የፍሪደም ሀውስ ጥናት በምሳሌነት ሊጠቀሱ የሚችሉ ናቸው።

ብሄራዊ መግባበት እና አርቅ ተግባራዊ የሚሆንበትን መንገድ መሻት

ለብሄራዊ መግባባት እና እርቅ በዋናነት እንቅፋት የሆነው ህወሀት/ኢህአዴግ ቢሆንም  በሽንጎው እይታ ሀገራችን ከምትገኝበት እጅግ ውስብስብ ሁኔታ ወደ ሀገመንግስታዊ ዴሞክራሲያዊ ስርአት የሚደረገው ሽግግር ሁሉን አሳታፊ በሆነ ሄራዊ መግባበት እና አርቅ መሆኑ አማራጭ የሌለው ነው። ይህ ምርጫችን የፖለቲካ አግላይነትን ለማስወገድ፣ ቂም በቀል የተሞላበት ፖለቲካ እንዲወገድ ያጥፊኛ ጠፊ አዙሪትን ለማክተም ሁሉም ባለ ድርሻወች በሀገራችን ችግሮችም መፍትሄወችም ላይ ባለቤትነት እንዲኖራቸው ለማስቻልና ለረዥም ጊዜ ያልተፈቱ ማህበራዊ፣ ፖለቲካዊና ታሪካዊ ብሶቶችንና፣ ቅሬታወችን በመነጋገር፣ በመግባባትና፣ አንዱ የአንዱን መከፋት፣ ብሶትና ምኞት ወዘተ በማዳመጥ ለመፍታት የተሻለ አማራጭ ሆኖ ሰላገኘነው ነው፡፡

ሽንጎው ፖለቲካኞች ከስልጣን በተወገዱ ቁጥር መጨረሻቸው እስርቤት የሚሆንበት፣ አንድ መንግስት ከስልጣን ሲወርድ የመንግስቱ ደጋፊወች ንብረታቸው ተወርሶ ወደ ድህነት የሚገፉበትን ፣ የፖለቲከኞች ቤተሰቦች መጨረሻቸው ስደት የሚሆንበት የፖለቲካ አዙሪት እንዲቆም ይፈልጋል ይታገላልም።

 

ማጠቃለያ።

ከ24 አመታት የህወሀት ኢእአዴግ ከፋፋይና አግላይ ስርአት በኋላ እነሆ የስርአቱ መጨረሻ እየተዳረሰ ነው። ይህን የለውጥ ሂደት ለመቀልበስና የሚታየውን ተስፋ ለመዳፈን ገዥው ቡድን አሁንም የመጨረሻ ሙከራ እያደረገ ይገኛል፤፡የስርአቱ እንዳለ መቀጠል ለሀገር አንድነትም ሆነ ለህዝባችን ሰላም እጅግ ሰፊ አደጋን ይጋብዛል። በመሆኑም የስርአቱ መቀየር ለነገ የማይባል ተግባር ነው። አሁን መለወጥ አለበት።

የህዝባችን የለውጥ እንቅስቃሴ በዝቅተኛ የሰው ህይወት መጥፋትና የየንብረት መውደም የሚፈለገውን የስርአት ለውጥ እውን እንዲያደርግ መጭውንም ጊዜ የሰላም የመረጋጋት እና የዴሞክራሲአዊ ስርአት ግንባታ እውና ለመድረግ የሚያሰፈልገው ስራ መሰራት መጀመር ያለበት ካአሁኑ ነው።

ይህን እውን ለመድረግ በኢትዮጰያ ብሄራዊ አንድነት እና የህዝቧም የሉአላዊነት ሙሉ በሙሉ መረጋገጥ አለበት። በሀገራችን ውስጥ የተለያዩ ወገኖቻችን የተለያየ ብሶት አንዳላቸው፣ ግልጽ ነው፤ በወደፊቱ ስርአት ውስጥ ሁሉም ኢትዮጵያውያን የሀገራችን ችግሮች በሀገራችን አንድነት ስር በሰላማዊ መንገድ እንዲፈቱ መነጋገር፤ መወያየት፤ መደራደር፤ መሰማማትና ለዚህም መስራት ይኖርብናል።

ከዚህ ውጭ በሰበብ ባስባቡ ሀገራችንን ለመበታተን የሚደረግ እንቅስቃሴ ሁሉ ያለምንም ማወላወል ልንቃወመው ይገባናል። አሁን በህዝባችን ላይ የተጫነው ስርአት ተወግዶ  የሁሉም ኢትዮጵያዊ ዴሞክራሲያዊ መብቶች የተከበረባት፤ ሁሉም ኢትዮጵያዊ ቋንቋው የተከበረበት፣ ማንነቱ የተከበረበት የህግ የበላይነት የሰፈነበት ህገመንግስታዊ ዴሞክራሲአዊ ስርአት መመስረት አጣዳፊ ተግባራችን ነው።

ይህንንም ለማድረግ አግላይ ያልሆነ የተቃዋሚ ሰፊ ግንባር/ትበብብር መመስረት አስፈላጊ ነው።በተበታተነ መልክ የሚካሄደው ትግል ለየብቻ በሚደረግበት ጥቃት ሰለባ ከመሆን አልፎ የኢትዮጵያ ህዝብ የሚፈልገውን ለውጥ ሊያመጣ ይችላል ብሎ መገመት ያዳግታል። እንዲያውም ባለቤትና አስተባባሪ የለለው በመሆን አንድም እንደ ስልሳ ስድስቱ የሀገራችን አብዮት ህዝብ ፍሬውን ይነጠቃል፣ አለያም ድህረ አረብ ጸደይ በሊቢያየመንና በሌሎቹ  እንደሆነው ሁሉ ትርምስ ሀገሪቱን ይወርሳል። ስለዚህም በርግጥም ለሀገራችን ብሩህ ተስፋ ሰንቀው የሚንቀሳቀሱ ድርጅቶች ይህንን ተገንዝበው መላን የተላበሰ የተባበረ ትግል ማድረግ እጅግ አስፈላጊነው። ለዚህም ተግባራዊነት ሽንጎ ዝግጁ ነው። የተቃዋሚው ክፍል መተባበር፤ ቢያንስ ህወሓት/ኢህአዴግን ለማስገደድ አስፈላጊ መሆኑን እናሳስባለን።

የሀገራችን ችግር እጅግ ውስብስብ ነው፣ መፍትሄውም እንዲሁ ቀላል አይደለም። በሆይ ሆይታና ባሳካሪ ፖለቲካ (intoxiicating politics) አጥጋቢ መፍትሄ ማግኝት እንደማይቻል ያለፈው 25 አመት ታሪክ አሳይቷል። ሀገራችን ኢትዮጵያ እንደደሴት ለብቻዋ ተነጥላ የምትገኝ አይደለችም፣ በጎረቤቶቻችንም ሆነ በአለም አቀፍ ደረጃ የሚታየው ሁኔታ እኛንም ይመለከተናል በበጎም በክፉም እኛንም ይነካናል።

ተቃዋሚው ከአግላይ ፖለቲካና ከየአውራ ፓርቲ አባዜ ራሱን ማላቀቅ እጅግ አስፈላጊ ነው እንላለን ። እነዚህ ሁለት አባዜወች ሀገራችንን ላለፉት 25 አመታት እና ከዚያም በፊት ወደጥፋት አረንቓ የወሰዱ አሁን ለምንገኝበት ምስቅልቅልና ችግር መሰረት የሆኑ መሆኑን ተገንዝበን ይህን ስህተት ላለመድገም መጣር የግድ ነው እንላለን።

በህገራችን ውስጥ የነጻነት ትግሉ በስፉት ቀጥሏል። ወገኖቻችን በተለይም ወጣቶች ለሰብአዊና ዴሞካራሲያዊ መብታቸው መከበር እንደሁለተኛ ዜጋ እየተቆጠሩ መኖር እንዲያበቃ ለማድረግ ቆርጠው እየታገሉ፣ ውድ ህይወታቸውንም እየገበሩ ነው። ይህን መሰዋእትነት ለውጤት ለማብቃት በጋራ እንነሳ። የኢትዮጵያና የኢትዮጵያውያን  ታላቅነት፣ የዚች ታሪካዊ ሀገርና ህዝቧ  ታላቅነት፣ እንዲሁም ብሩህ ቀን ከፊት ለፊታችን ነው።

ድል ለኢትዮጵያ ሕዝብ

Hits: 1408

“ፍየል ወዲያ ቅዝምዝም ወዲህ!!”

በትናንትናው ዕለት የህወሃት/ኢሕአዴግ ጠ/ሚኒስትር አቶ ሃይለማርያም ደሳለኝ ህወሃት በሚቆጣጠረው ፓርላማ ተገኝቶ መንግስቱ በወጠነው የአምስት ዓመት መመሪያና በተለያዩ ርዕሶች ላይ ማብራሪያ ሰጥቷል።

የታቀደውን የኤኮኖሚ ትራንስፎርሜሽንን በተመለከተ የግብር አሰባሰቡ በበለጠ እንዲያድግ የሚያስገድድ ሕግ እንደረቀቀ፣ በገጠሩ የልማት እንቅስቃሴና መጠነኛ የእንዱስትሪ ተቋማት እንዲጎለብቱ የልማት ባንኩ ብዙ ካፒታል መድቦ ዘርፎችን በመዘርጋት ለመንቀሳቀስ እንደታሰበ ያብራራ ሲሆን በአለፈው የአምስት ዓመቱ ዕቅድ የባከነውን ገንዘብና የአገር ሃብት ከቁጥር ውስጥ ሳያስገባ እንዳልነበረ አድርጎ ሸፋፍኖ አልፎታል። የልማት ባንኩ ለህብረተሰቡ የሚሰጠውን ጥቅምና አገልግሎት ቢጠቅስም፣ ብድርና ድጋፍ የሚያገኘው የህብረተሰብ ክፍል በግልጽ አልተቀመጠም። በማንኛውም አገር 90 በመቶ የሚሆነውን የስራ ዕድል የሚፈጥረው የግል ክፍሉ ነው። የግል ክፍሉ ይህን ለማድረግ የሚችለው የሚሰራበት መሬት፣ የአጭር፣ የመካከለኛና የረጅም ጊዜ ብድር በተፈለገው መጠን ለማግኘት ሲችልና በአገሪቱ ክፍሎች በሙሉ ያለምንም ገደብ ለመንቀሳቀስ ሲችል ነው። በተጨማሪ አገር ተከልና አገር ወለድ የግል ክፍል ከፍተኛ ሚና ሊኖረው የሚች ለውመንግሥት ለውጭ ኢንቬስተሮች የሚሰጠውን አድላዊ ድጋፍና እንክብካቤ በመቆጠብ ለኢትዮጵያውያን ፊቱን ሲያዞር ነው። ......ሙሉውን ለማንበብ ይህን ይጫኑ

Hits: 1353

የኢትዮጵያ ድንበር እየተቆረሰ ለጉርብትና የሚሰጥ ገጸበረከት(ዳረጎት) አይደለም

ለብዙ ዘመናት በኢትዮጵያውያን መስዋእትነት ተከብሮ የኖረው የኢትዮጵያ ድንበር ከቅርብ ጊዜ ወዲህ በአገር በቀል በሆነው የውጭ ሃይሎች አገልጋይ ህወሃት/ኢሕአዴግ የተባለ ቡድን በብሔር ስም አገራችንን በታትኖ ለሚመሰርተው ጎጠኛ መንግስት ድጋፍ ለመሰብሰብ ሲል ኢትዮጵያውያን ለዘመናት ከትውልድ ትውልድ እየተረካከቡ የኖሩበትን በቁመቱ 1600 ኪሎሜትርና ስፋቱ ከ40-60 ኪሎሜትር የሆነ ለም መሬት “ለታላቋ ትግራይ” ምስረታ ዓላማ ገና ከጅምሩ ለተባበረችው ሱዳን አሳልፎ ለመስጠትና ድንበር ለመካለል ሽር ጉድ እያለ ነው። “የታላቋን የትግራይ”ን ክልል ለማስፋት ሲባል ኩታገጠም የሆነውን የጎንደርንና የወሎን ክፍለ አገር ሰፊና ለም መሬት በጉልበት የትግራይ ክልል ውስጥ ቀላቅሎ ሕዝቡንም ከሚናገራቸው ቋንቋዎች በአንደኛው ፣በትግርኛው ምክንያት ካለሕዝቡ ምርጫና ፍላጎት በማጠቃለልና በማስፈር በሕዝብ መካከል መቃቃርና ቋሚ ግጭት ለመፍጠር በትጋት ቀጥሎበታል።በምስራቁም ቢሆን ሶማሌዎች ይገባናል ብለው ከኢትዮጵያ ጋር በተደጋጋሚ ጦርነት የከፈቱበት ጥያቄ በመሆኑ ጠንከር ያለ የሶማሊያ መንግስት የለም እንጂ ቢኖር ለመፈራረም ወደዃላ አይልም፤የኦጋዴን ነጻ አውጭ ነኝ የሚለው ተገንጣይ ሃይል ፈርጠም ካለ የሚጠይቀውን የኢትዮጵያ ግዛት ገንጥሎ ከሶማሊያ ጋር ለመቀላቀል ወይም የራሱን ክልል መንግስት ለማቋቋም በውጭ አገርና በወያኔ ሚስጥራዊ ድጋፍ ጭምር ሁኔታው ከቀን ወደቀን እየተመቻቸለት ነው።በኬንያም በኩል ቢሆን የይገባኛል ጥያቄ ቢነሳ የኢትዮጵያ ሞያሌን አሳልፎ ለመስጠት ህወሃት/ኢሕአዴግ አይግደረደርም። ጅቡቲም ደፍራ የአፋር መሬት ይገባኛል ብትል ህወሃት ቆርሶ ከመስጠት አይመለስም። በመሃል አገርም ውስጥ የተለያዩት ተገንጣይ ሃይሎች ከበረቱ፣ጭራሽ ለመቆጣጠርና ለመግዛት የማይቻልበት ሁኔታ ከተፈጠረ “ጨዋታ ፈረሰ ዳቦ ተቆረሰ” በማለት ሕዝቡን ከቀውስና ከእርስ በርስ ጦርነት ውስጥ ከተው ወደአዘጋጁት ቦታ ለመሄድ ለህወሃት/ ኢሕአዴግ መሪዎች አይከብዳቸውም። “የታላቋ ትግራይ” ሕልም እውን ከሆነ የሌላው መኖር አለመኖር አያስጨንቃቸውም።

 የክልል ጥያቄ ሌላ መልክ እየያዘና እየተካረረ መጥቷል።በኦሮሚያ ክልል ውስጥ የሚታየው የአላስነካም ትግል የዚህ አንዱ አካል ነው።የትግሉ አዝማሚያ ሲመረመር በኢትዮጵያ አንድነትና በዴሞክራሲ ስርዓት መስፈን ዙሪያ ሳይሆን የማንን መሬት ማን ይወስዳል የሚል ጎሳና ክልል ተኮር የሆነ ተቃውሞ ነው።ወያኔ በቀየሰው መንገድ ኢትዮጵያን በጎሳና በክልል ለያይቶና ሸንሽኖ ለመበታተን የሚደረገውን ማንኛውንም ጸረ አንድነት ንቅናቄ ሸንጎ ይቃወማል፤ይታገላልም። ከሁሉም በፊት ግን የጎሳ ፖለቲካና እንቅስቃሴ ለማንም እንደማይበጅና ሁሉንም የሚጎዳ መሆኑን ደግሞ ደጋግሞ እየገለጸ ትግሉ ሁሉን ያቀፈና ያሳተፈ ለጋራ ጥቅም መሆን እንደሚገባው ይገልጻል።

በህወሃት/ኢሕአዴግና  በሱዳን መካከል የሚደረገውን የድንበር ውል እንደማይቀበለውና ይህን በውጭ ሃይሎች ፍላጎት ላይ የተመሰረተ ኢትዮጵያን የማዳከምና የማፈራረስ ተንኮል በዝምታ እንደማይመለከተውና እንደማይቀበለው እየገለጸ በድንበር ኮሚሽን የቀረበውን ታሪካዊ ማስረጃና የባለቤትነት ጥያቄ ከልብ ይደግፋል።በሚፈለገው ቦታ አብሮ ለመቆም ዝግጁ ነው።     

በሌላውም ያገሪቱ ክፍል ሕዝባዊ እንቅስቃሴ በመቀጣጠል ላይ ነው።የክልል ዓላማ ከሚያስተናግዱት ጎን ለጎን በኢትዮጵያዊነት ፣ለኢትዮጵያ አንድነት፣ለዴሞክራሲ ስርዓት መስፈን፣ለሕግ የበላይነት የሚታገሉትም በተለያየ መንገድና ቦታ በሚችሉት መንገድ ድምጻቸውን እያሰሙ ነው።ከነዚህ ጋር ሸንጎ የትግሉ አካል መሆኑንና አብሯቸው እንደሚሰለፍ ሊገልጽ ይወዳል።

በየአቅጣጫው እየተካረረ የመጣው ሕዝባዊ እንቅስቃሴ ሁለት ዓይነት ክስተቶችን ሊወልድ ይችላል።

1ኛ.የጎሰኞች እንቅስቃሴ ከተጠናከረና የአንድነቱ ሃይል ከተዳከመ ኢትዮጵያ የመገነጣጠል ዕድሏ ከፍተኛ ይሆናል።

2ኛ.የአንድነት ሃይሉ ከተሰባሰበና እንደ ሃይል ከወጣ የሚፈራው አደጋ ሊቀለበስ ይችላል።

የኢትዮጵያ መገነጣጠል ለማንኛውም ቢሆን የሚሻልና የሚጠቅም አይሆንም። ትርፉ ይበልጥ ደቃቃና ደካማ ሆኖ ለውጭ አደጋ መጋለጥና ከድህነት ሳይወጡ እርስ በርሱ በድንበር ምክንያት፣በማያባራ ግጭት ውስጥ መኖር ነው።

ለሁሉም ጠቃሚና የሚሻለው መንገድ ሃይልን አስተባብሮ የጋራ ጠላትን አሶግዶ በአንድ አገር ልጅነት፣በኢትዮጵያዊነት ተከባብሮ  የሚኖሩበትን ዴሞክራሲያዊ ስርዓት አስፍኖ ለመኖር በጋራ መታገል ነው። ለዚህ የጋራ ድል በተለያየ ብሄርና በፖለቲካ ድርጅት ስም ተነጣጥለው የሚታገሉት አንድ ላይ ሆነው የጋራ መመሪያ በማውጣት ትግላቸውን የሚያቀናጅ አካል መፍጠር ይኖርባቸዋል። ጊዜውም አሁን ነው።ያ የሚፈጥሩት አካል ወያኔ በተወገደ ማግስት የሽግግር መንግስት ለማቋቋም የሚረዳ መሠረት ሊሆን ይችላል።ከዚህ ውጭ በያዙት መንገድ ከቀጠሉ ማንም ያሰበውን ሳያገኝ ባለው ጨቋኝ መንግስት ወይም ከሱ ባልተለዬ አዲስ መጥ ዘረኛና አምባገነን ቡድን ሲደሙ ከባሰም ኢትዮጵያ ተበታትና  አገረ ቢስ ሆኖ በያገሩ ተሰዶ መኖር ይሆናል።

ጊዜው ከመምሸቱ በፊት አሁን በረፋዱ ሰዓት የግል ፍላጎትን ትቶ በጋራ ፍላጎት ላይ ማተኮር ይገባል። 

የኢትዮጵያ ሕዝብ የጋራ ትግል ሸንጎ (ሸንጎ ) በአገር ቤትና በውጭ አገር የሚታገሉት ኢትዮጵያውያን በአስቸኳይ ተሰብስበው አገራችንን ለገጠማት ችግርና አደጋ መልስ መስጠትና ለአገር አድን ተጋድሎ መዘጋጀት እንዳለባቸው ጥሪ እያደረገ ለመተባበር ዝግጁ መሆኑን ይገልጻል። 

ኢትዮጵያ በአንድነት ለዘላለም ትኑር!

Hits: 1073

External links are provided for reference purposes. Shengo is not responsible for the content of external Internet sites. Copyright © 2013 የኢትዮጵያ ህዝብ የጋራ ትግል ሸንጎ [ሸንጎ] ኦፊሴላዊ ድረ ገፅ

Top Desktop version